LAOAG CITY – Nagduduma dagiti anggulo a kitkitaen dagiti kameng ti PNP-San Nicolas iti panagbekkel a puon ti nakatayan ti maysa a lalaki nga agtawen ti 27 ken residente iti nasao nga ili.
Inbatad ni PMsgt. Johnley Apostol, chief investigator ti PNP San Nicolas a maysa ditoy ti ipapanaw ti asawa ti biktima a napan nakipaskua iti pamilya na iti ili ti Vintar.
Innayun na a basar kadagiti nakalap da nga impormasyon, posible a makumikon pay ti biktima iti tentennagan na a motorsiklo a ginatang ti kabsat na.
Segun ken ni Apostol, rumrumuar adda ti panagamak ti biktima iti panagpanaw ti asawa na agsipod ta daytoy ti rason ti immuna a panannggandat na nga agpakamatay addan dua a tawen ti napalabas.
Kabayatanna inlawlawag ni Apostol a ti motorsiklo a tentennagan ti biktima ket sukat ti motorsiklo a nadadael ti kabsat na kalpasan a nadesgrasya.
Iti agdama ket maiyus-uswat ti naun-uneg nga imbestigasyon mainaig iti nasao nga insidente.
Kabayatanna, pimmusay ti maysa a lalaki ili Brgy. Lumbaan iti ili ti Pinili kalpasan a nagbekkel iti uneg ti pagtaenganna.
Inpakaamo ni PLt. Reycar Almazan, ti chief of police iti PNP-Pinili a ti biktima ket agtawen ti 52, seperated ken awanan ti trabaho.
Segun ken ni Almazan, ti kaanakan ti biktima ti nakakita kenkuana a nakabitin iti maikadwa a kadsaran ti pagtaenganda babaen iti waya.
Kuna na a ti makitkita a motibo iti panagebekkel ti biktima ket depresyon ken mainaig iti ayat.
Kabayatanna, naamoan nga addan ti immun-una a pannaggandat ti biktima nga agpakamatay nu sadino nga iti umuna a gundaway ket binagkong na ti bukod na a bagi ken iti maikadwa ket naglaslas.
Mainaig iti daytoy, addan ti lima a kaso ti panagpakamatay ditoy probinsya manipod nangrugi ti bisperas ti paskua.
