LAOAG CITY – Immabot laeng ti dua nga insidente ti uram ti naimaldit ti Bureau of Fire Protection iti siudad ti Batac idi bulan ti Marso.
Daytoy ti inbatad ni Fire Sr. Insp. Eddy Tabuno, fire marshal iti nasao a siudad.
Kuna na a dua nga grassfire ti napasamak iti kallabes.
Inlawlawag ni Tabuno, posible a napasamak ti grassfire gapu ti kinabara ti panawen, panagpoor ti basura, ken dagiti rungrung ti sigarilyo.
Inbatad na nga uray agkurkurang ti bombero ket awan met ti problema iti biang ti resources ken iti panagresponde da.
Inpasingked ni Tabuno nga agtultuloy ti pananginspeksyon da dagiti balay ken establisimiyento.
Ibiliang ti opisyal a ballaigi dagiti programa ti BFP gapu ta nasagepsep dagiti umili dagiti inpaadal ken inbalakad da.
