LAOAG CITY – Agpada a naglikudan dagiti dua a subject iti drug buy-bust operation a naiyuswat iti Barangay 16 iti ili a San Nicolas ti alegasyon kontra kadakuada.
Nabigbig dagiti subject iti operasyon a da Rudy Mark Agustin, 28, baro, traysikel driver, ken ni Patrick Pasalo, agtawen iti 25, construction worker, agpada dagitoy a residente iti Barangay San Juan Bautista iti ili a San Nicolas.
Iti palawag ni Agustin, bayat ti panaggiinum da ti maysa a pasdek iti nasao a barangay ket adda ti nakariri da, ngem saanda a ninamnama a dagitoy ket kameng ti pulisya.
Inlawlawag na nga idi nakita na ti panangrimrimpong dagiti maseknan iti kadwa na a ni Pasalo ket napanna insalakan.
Inpetteng da Agustin ken Pasalo a saan da a kukua dagiti 6 a sachet a naglaon ti maipagarop a shabu ken marijuana iti ikot da.
Naamoan a naalaan dagiti dua iti sagtatallo a sachet da a naglaon ti maipagarop a shabu ken marijuana.
Inadmitir dagiti dua a nagus-usar da iti illegal a droga ken dati dagitoy a drug surrenderer ngem nabayagen a nagbaliw da.
Kabayatanna, inbatad ni Deputy Chief of Police Daryl Galiza iti PNP-San Nicolas nga iti laengen korte nga agpalawag dagiti suspek.
Maisagsaganan ti kaso a panaglabsing iti RA 9165 kontra kadagiti nasao a suspek.
Kabayatanna, nagbalin nga emosyonal ni Mrs. Elizabeth Agustin iti pannakatiliw ti anak na a ken inpetteng na nga awan ti kwarta ti anak gapu ta napan pay nangibaga kenkuana idi rabii ngem awan ti naited da.
Nupay kasta, kuna na a nasdaaw laengen ti anak na gapu ta iti kaadda da iti PNP-San Nicolas ket adda metten ti kwarta iti wallet na.
Innayon ti ina nga Agustin a ti laeng ammo na a bisyo ti anak na ket ti mapan iti beerhouse gapu ta awan ti asawa na.
Inpasingked ni Mrs. Agustin a sungbatan ti anak na ti aniaman a kaso a maipila kontra kenkuana gapu ta mamati nga awan ti basol ti anak na.
