LAOAG CITY – Dua a kaso ti posible nga ipila ti PNP-San Nicolas kontra kada Resty Arcangel iti Bgy. Mabusag-A iti ili a Badoc ken ni Richard Calibuguen iti ili ti Nueva Era, dagiti suspek iti panagubor iti maysa a bus ti GMW.
Daytoy ti inbatad ni P/C/insp. Ryan Retotar Hepe ti Pulisya ti nasao nga ili.
Kuna na a malaksid ti maliscious mischief nga ipila da a kaso kadagitoy ket ipila da pay ti kaso a panagsalungasing ti RA 9165 wenno Comprehensive Dangerous Drugs Act of 2002.
Daytoy ket kalpasan a nakita da iti uneg ti “utility box” ti motor nga inusar ti maysa kadagiti suspek nga adda a tallo a sachet a naglaon ti maatap a shabu ken dua a lighter.
Kuna ni Retotar maipadalan ti pannakaamiris dagiti naala a sachet ken karaman dagiti suspek ken agserbinto met a witness ti driver ti naubor a bus iti pannakaipila ti kaso kontra kadagiti maseknan.
