LAOAG CITY – Kinumpirmaran ni SPO2 Joey Aninag, chief investigator ti PNP-Pasuquin a dua ti natay idinto a maysa ti nasugatan kalpasan a naidungpar iti poste ken natennag iti kataltalunan ti maysa a fortuner a nagluganan dagiti opisyal ti barangay iti Isabela iti paset ti Barangay Pragata idiay ili ti Pasuquin.
Binigbig ni Aninag dagiti natay a da Josephine Moises, barangay Treasurer iti Burgos Isabela ken ni Edmundo Martillano, idinto a ti nasugatan ket ni Novelito Abaya, driver ti fortuner ken residente met laeng idiay Isabela.
Segun ken ni Aninag, innem amin dagiti nakalugan iti fortuner ken lima kadagitoy ket opisyal ti barangay idiay Isabela nga umay koma ditoy ciudad ti Laoag tapno agatendar iti convention.
Innayon ni Aninag nga inadmitir a mismo ti driver a ni Abaya a nakaturog bayat nga agmanmaneho isut gapuna a naidungpar ti lugan iti electric post kalpasan na ket nagbaliktad ken natennag iti taltalon.
Inbatad ni Aninag a natulid pay ti poste iti mismo a lugan ken naipit dagiti biktima a nagresulta ti pannakatay da Moises ken Martillano nga agabay iti tengnga ti fortuner.
Iti agdama, agtultuloy iti imbestigasyon dagiti otoridad mainag iti napasamak nga aksidente.
