LAOAG CITY – Natay dagiti dua nga indibidual ken maysa ti nasugatan kalpasan a naidungpar ti nagluganan da a tricycle iti poste ti kuryente iti Pinili-Nueva Era Road, bisinidad ti Brgy. Pagdilao iti ili ti Pinili.
Nabigbig dagiti natay nga isuda Larry Talub Jr., agtawen ti 22 ken residente iti Brgy. Bulbulala, Pinili ken ni Kenneth Kingsley Calad, agtawen ti 21, residente iti Brgy. Napu, Badoc idinto a ti nasugatan ket ni Jess Paul Dahilig, agtawen ti 21 ken residente met iti Brgy. Capangdanan, Pinili, Ilocos Norte.
Segun kenni Police Captain Kester Arellano, ti chief of police ti Philippine National Police iti ili ti Pinili, naggi-inom dagiti biktima iti nasao a lugar ken mapan da kuma iti ili ti Badoc tapno agkaldo.
Nupay kasta, idi nakadanon da iti nakapasamakan ti insidente ket napukawan ti kontrol iti manibela ti driver a ni Talub a nangitunda ti pannakaidungpar ti tricycle da iti poste ti kuryente.
Gapo iti daytoy, nagsagaba ti sugat dagiti tallo a biktima no sadinno ti driver a ni Talub ket dagus a pimmusay idinto a ni Calad ket pimmusay bayat a matamtaming ken ni Dahilig ket manarimaan ti panagpalaing na iti Karmelli Clinic Hospital.
Kabayatanna, agtultuloy met ti imbestigasyon dagiti otoridad seknan iti nasao nga insidente.
