LAOAG CITY – Dead on arrival dagiti dua a tattao ken agtultuloy a maag-agasan dagiti tallo a sabsabali pay kalpasan ti panagdinnungpar dagiti dua a motorsiklo iti paset ti Barangay Saud, Badoc, Ilocos Norte.
Nabigbig dagiti natay da Sherwin Pagatpatan, residente iti Barangay Madupayas, Badoc ken ni Scarlet Vergara, residente met iti Barangay Morong iti nasao met laeng nga ili.
Segun kenni Police Lt. Noli Alejandro, ti deputy chief of police ti PNP-Badoc, kadwa ni Pagatpatan da Aristotle Semana ken agnagan ti Martin a nakalugan ti TMX ken kadwa met ni Vergara ti asawa na a ni Michael Vergara.
Iti inisyal nga imbestigasyon dagiti otoridad, kuna ni Alejandro a bayat nga agpadaya a direksyon da Pagatpatan iti kurbaan a paset ti kalsada ken nakadinnungpar da ti nagluganan ti agasawa a Vergara.
Kunana a basar pay iti nakalap da nga impormasyon ket immagaw ti linya ti TMX a nagluganan da Pagatpatan a rason ti head on collision.
Inbatad na a saan da pay a makumpirmaran no nakainom da Pagatpatan nga aggapo iti Barangay Pagsanajan iti nasao met laeng nga ili.
Agtultuloy met ti imbestigasyon dagiti otoridad mainaig iti nasao a pasamak.
