LAOAG CITY – Natiliw dagiti dua a babbai ken nakalibas ti maysa a lalaki iti anti-illegal gambling operation nga inyuswat dagiti otoridad iti Sitio Linglingay, Brgy. San Juan, Solsona, Ilocos Norte.
Daytoy ti kinumpirmaran ni Police Captain Randy Damo, ti chief of police ti Philippine National Police iti ili ti Solsona.
Binigbig ni Damo dagiti natiliw nga isuda Venus Lavtis y Aguilar, agtawen ti 34, naasawaa ken residente iti Brgy. Bubuos iti ili ti Solsona; Lilibeth Maulit y Andres, agtawen ti 37, rsidente iti Brgy. San Juan iti nadakamat met laeng nga ili idinto a ti nakalibas ket ni Levie Paguyo, adda iti umno a tawen ken residente iti Brgy. Capurictan, Solsona.
Segun kenni Damo, idi rabii ket nakaawat da ti report nga adda ti agsusugal rason a dagus a nagresponde dagiti kameng ti pulisya partikular iti pagtaengan ti agnagan ti Ester Andres y Ramos.
Naaktoan dagiti otoridad dagiti suspek nga agay-ayam ti tong-its rason a tiniliw da dagitoy ngem adda ti maysa a nakalibas.
Nakumpiskar met dagiti otoridad ti 33 a pidado ti baraha, maysa a lamisaan, tallo a monoblock a tugaw, maysa a cellphone ken 900 a pisos.
Manamnama met a mapilaan dagiti suspek ti kaso a panaglabsing iti PD 1602 wenno Illegal Gambling.
Kabayatanna, kuna ni Damo a malaksid nga iligal ti panagsusugal ket makitkita pay a mismo dagiti ubbing.
Immapela met ni Damo kadagiti kailyan na a saan nga agsusugal tapno saan a matiliw ken mabalod.
