LAOAG CITY – Natiliw dagiti dua nga indibidual ken tallo ti nakalibas gapo iti panagsusugal da iti maysa a minatayan iti Barangay Puttao iti ili ti Solsona.
Daytoy ti kinumpirmaran ni Police Captain Randy Damo, ti chief of police ti Philippine National Police iti nasao nga ili.
Segun kenni Damo, dagiti dua a natiliw a lallaki ket ni Nestor nga agtawen ti 56 ken ni Clemente nga agtawen met ti 47, idinto a dagiti nakalibas ket isuda Virgilio, Esteban ken Jeffrey, agpapada a residente iti Barangay Puttao.
Inbatad na nga adda ti dimmanon a report kadakuada seknan iti iligal a panagsusugal isut gapo na a dagus da a nagresponde.
Kunana nga iti panagturong da iti lugar ket naaktoan da dagiti maseknan nga agay-ayam ti lucky-9 a nakatiliwan dagiti dua nga indibidual ken nakataray dagiti kakadua da.
Nakumpiskar dagiti otoridad ti 5,025 pesos a pusta, baraha, table cloth, lamisaan ken pito a tugaw. Iti agdama, nagtalinaed dagiti dua a natiliw iti kustudiyar ti Philippine National Police iti nasao nga ili.
