LAOAG CITY – Umabot iti 5,563 nga indibidual ti nagidonar ti dara iti naiyuswat a Dugong Bombo 2023 babaen kadagiti istasyon ti Bombo Radyo ken Star FM.
Katukad daytoy ti 2,503,350 a CC ti dara wenno 2,503.35 a litro wenno 661.31 a gallon wenno 12.02 a drums
Ti naggigiddan a bloodletting activity ket inyuswat ti Bombo Radyo Philippines, iti pannakibinulig ti Bombo Radyo Philippine Foundation Incorporated ken ti Philippine Red Cros.
Ditoy Bombo Radyo Laoag, umabot iti 219 nga indibidual ti balligi a nakaidonar ti dara iti naiyuswat a Dugong Bombo 2023 iti Laoag City Auditorium.
Daytoy ket 98,550 a CC ti dara wenno 98.55 a litro wenno 26.03 a gallon wenno 0.47 a drums
Maysa kadagiti nagidonar ket ni Mr. Ancelmo Dagan, maysa a successful blood donor ken mangisursuro iti Ilocos Norte College of Arts and Trade ken residente it Barangay Nalbo ditoy ciudad ti Laoag no sadinno naragsak a nakaidonar manen ti dara.
Segun kenni Daga, kanayon a makiparpartisipar iti Dugong Bombo ti Bombo Radyo Philippines gapo ta maysa daytoy a wagas tapno makatulong kadagiti agkasapulan ti dara.
Inlawlawag na a malaksid a makatulong kadagiti agkasapulan ket napintas para para iti sirkulasyon ti dara ti regular a panagidonar na iti daytoy.
Maysa pay kadagiti blood donors ket agtawenen ti 60 ken daytoyen ti maika-20 a daras a nagidonar ti dara gapo iti dakkel a tulong daytoy iti sabali nga indibidual.
