LAOAG CITY – Balligi a naisayangkat ti Dugong Bombo 2024 ita nga aldaw, Nobiembre 16, 2024.
Daytoy ti inpasingked ni Mrs. Edna Orcino, Administrator ti Philippine Red Cross – Ilocos Norte Chapter.
Segun kenkuana, pudno a dakkel a tulong dagiti naukkon a dara manipud kadagiti nagidonar ti dara para kadagiti pasiente iti ospital nga agkasapulan unay ti dara.
Inbatadna a dagiti naukkon a dara ket kangrunaan a mausar para kadagiti maseknan a pasiente nga agsagsagaba ti anemia, pannakaipadalan iti operasion wenno dagiti nakana a sakit.
Inlawlawagna a dakkel ti akem ti Bombo Radyo iti balligi a pannakaisayangkat ti blood donation drive gapu ta ad-adu dagiti magutigot nga indibidual a makipaset iti naindaklan nga aktibidad.
Mainaig iti daytoy, naammoan a naruay nga umili ti nakipaset iti Dugong Bombo 2024 kadagiti dua a venue ti Bombo Radyo Laoag iti Robinsons Mall iti ili ti San Nicolas ken iti Imelda Cultural Center iti siudad ti Batac.
Kabayatanna, naggegeddan dagiti amin a 31 Bombo Radyo Stations ken Star FM Stations ti Bombo Radyo Philippines ti pannakaisayangkat ti naisangsangayan a Dugong Bombo 2024.
