LAOAG CITY – Umabot iti dua gasut a ribu a pisos ti napaglakoan dagiti nakipaset iti umuna nga aldaw a pannakaisubli ti Buy IN Sunday Market iti sangoanan ti kapitolio probinsial idi Domingo Marso 31.
Daytoy ti inpakaammo ni Mrs. Elma Gabriel, mangidadaulo ti Micro Small and Medium Enterprise Office wenno MSMEO ti gobierno probinsial ti Ilocos Norte.
Segun kenkuana, kaaddoan kadagiti naggatang wenno nangipaay ti suporta kadagiti produkto ti probinsia ti pumanaw a dagus apaman a makagatangda.
Mainaig iti daytoy, kunana nga awan ti napasamak a panagdudupudop dagiti kakailian a nangipaay ti suporta iti nasao nga aktibidad.
Inlawlawagna nga agtultuluyen a maiyuswat ti nasao nga aktibidad iti kada malem ti domingo iti sangoanan ti kapitolio probinsial.
Mangnamnama ni Gabriel a no kasano ti kinapintas ti panagannayas ti umuna nga aldaw a pannakaisubli ti BUY IN Sunday Market iti sangoanan ti kapitolio ket kastoy met laeng kadagiti sumarsaruno nga aldaw a pannakaisayangkatna.
Inbatadna a duapulo ket walo (28) dagiti Micro Small and Medium Enterprise wenno babassit a negosiante kangrunaanna dagiti naglako ti merienda ken dadduma pay a klase ti makmakan, dagiti mannalon a nangilako kadagiti produktoda a natnateng ken prutas.
Kunana nga adda pay dagiti naglako iti makan ken saan a makmakan a “pasalubong”.
Innayonna a nakipaset pay dagiti Technical Education and Skills Development Authority scholar a nangisayangkat ti panagmasahe ken adda pay dagiti “henna” ken “tattoo groups” a nangitunda iti pannakatulong met kadagitoy a naaddaan ti pamastrekan.
