LAOAG CITY – Inpakaammo ni Mr. Alfredo Alba Sr., Presidente ti Federation of Senior Citizens Association of the Philippines a dumanon iti 800 a senior citizens dagiti matulungan iti Outreach Program babaen mismo iti asosasionda.
Segun kenkuana, dagiti mabenepisiaran ket dagiti maibilang a poorest of the poor nga ad-adda nga agkasapulan ti pannakaipaay ti tulong.
Inbatadna a dagiti maseknan a senior citizens ket maikkan ti maysa a sako ti bagas ken nagduduma a grocery items a dakkel a tulong para iti panagbiagda.
Inlawlawagna a naggapu ti kuarta iti savings ti Federation of Senior Citizens Association of the Philippines ken napagnunumoanda a mausar daytoy a panangtulong kadagiti nataengan nga umili.
Kunana a daytoy ti damo nga iyuswatda ti nasao a programa ket mangnamnama isuna nga ad-adunto pay ti maibunongda a tulong para kadagiti maseknan a senior citizens.
Innayonna a dagiti pimmusay a miembro ti organisasionda ket makaawat ti 40 a ribu a pisos ngem nakadepende no kasano ti kabayagna a miembro dagitoyen.
