LAOAG CITY – Umabot iti 122.23 billion pesos ti nagun-ud ti rehion uno nga approved investments manipud kadagiti Pilipino ken kadagiti gangannaet nga investors wenno agpupuunan iti napalabas a tawen 2023.
Inlawlawag ni Gob. Matthew Marcos Manotoc, Chairman ti Regional Development Council a makita ti kinatibker ti ekonomia ti rehion iti kinangato ti employment rate nga immabot iti 95.5%.
Segun kenkuana, daytoy ti mangipasigurado a kabaelan dagiti umili a maipaay ti kasapulan dagiti pamiliada.
Malaksid iti daytoy, nakabaelan pay ti rehion uno a naipangato ti kinaproduktibo dagiti umili.
Kabayatanna, kuna ti Gobernador nga iti benneg ti ekonomia, ti services sector, agrikultura, forestry, fisheries ken iti industry sector ket agpapada a dakkel ti nagdur-asanda.
