LAOAG CITY – Kinumpirmaran ni Police Major Darwin Ocon iti Aviation Security Group iti Laoag International Airport (LIA) a pinilaan da ti kaso mainaig iti Anti-Bomb Joke Law ti maysa a Dutch National kalpasan nga inyangaw na nga adda ti bomba iti bagahe na bayat ti pannakainspeksyon na iti departure area ti nasao nga erupuerto.
Binigbig ni Ocon ti suspek a ni Mary Evelyn Dolor Neuen, taga Sta. Maria Ilocos Sur ngem maysan a German Citizen, agtawen ti 70, ken retired nurse idiay Germany.
Segun ken ni Ocon, agturong koma ni Neuen kadwa na ti pamilya na iti Metro Manila manipod iti panagbakasyon da iti Sta. Maria, Ilocos Sur, ngem gapu iti inaramid na ket nagtalinaed iti kustodyar ti Aviation Security Group iti uneg ti tallo nga aldaw kalpasan a pinilaan da ti reklamo.
Kuna pay ni Ocon a sakbay a tiniliw da ti Dutch National ket nailawlawag kenkuana ti pagsasao nga “ignorance of the Law excuses no one” isut gapuna a liklikan ti kastoy a klase iti angaw kangrunaan na no adda iti erupuerto.
Nupay kasta, inbasura ti piskalya ti inpila da a reklamo kontra ken ni Neuen gapu ta maipagarop a nagkurang da ti element no sadinno a saan a naaddaan ti komosyon ken awan dagiti tattao a nagpanic.
Inlawlawag ni Ocon a saan unay a napigsa ti panangisawang ni Neuen nga adda ti bomba iti bagahe na rason nga awan dagiti tattao a nakangngeg malaksid iti baggage inspector nga isu ti dagus a nagreport iti Philippine National Police apaman a nangngeg na ti “bomb joke” ti Dutch national.
Inpakaammo ni Ocon a kalpasan nga inbasura ti piskalya ti kaso ni Neuen ket dagus da a pinaluspusan no sadinno a mabalin nga iti daytoy a gundaway ket manarimaanen ti panagbiyahe da nga agsubli idiay Germany.
Innayon na a daytoy ti kaunaan a gundaway nga adda ti pinilaan da ti reklamo gapu iti “bomb joke” iti nasao nga erupuerto.
Mainaig iti daytoy, naamoan ni Ocon manipod iti pamilya ni Neuen a naangaw laeng ti nasao a Dutch National.
