LAOAG CITY – Makidanggay ti gobierno probinsial ti Ilocos Norte babaen ti Ilocos Norte Environment and Natural Resources Office iti selebrasion ti “Earth Day” intono Abril 22 ita a tawen 2024.
Nupay kasta, kuna ni Engr. Pedro Agcaoili Jr., Officer In-charge ti nasao a pangopisinaan a saan a maisayangkat iti nadakamat nga aldaw ti aktibidad nga iyuswat ti probinsia.
Inlawlawagna nga imbes nga Abril 22 ket iyuswat ti probinsia ti nasao nga aktibidad intono Abril 23 wenno iti kabigatan ti nadakamat nga aldaw.
Kunana a malukatan ti Region 1 Athletic Association Meet intono malem ti Abril 22 rason a napagnunumoanda a maitantan ti maipatungpal nga aktibidad.
Inbatadna a ti inprograma ni Mr. Joegie Jimenez, Environment and Pollution Control Officer nga aktibidad ket ti panagdalus ti “estero” ditoy siudad ti Laoag.
Segun ken ni Agcaoili, nupay daytoy ti kakaisuna nga aktibidad ti probinsia ket mabalin dagiti dadduma a Local Government Units ditoy probinsia ti mangisayangkat ti maiyasping nga aktibidad.
Malaksid iti daytoy, namnamaenna nga ad-adu dagiti maisayangkat nga aktibidad intono bulan ti Hunio a panangrambak ti “Environment Month.”
Innayonna a mabalin nga adda ti maisayangkat a panagmula ti kayo iti nasao a bulan no addanton ti mapasaran a tudtudo.
