LAOAG CITY – Naisayangkat ti orientation ken panagtataripnong maipapan iti Republic Act No. 9003 wenno Ecological Solid Waste Management Program kadagiti nagduduma a barangay ditoy siudad ti Laoag.
Segun ken ni Ms. Mylene Pascual, ti mangidadaulo iti City Environment and Natural Resources Office, napateg la unay a maidanon ken mailawlawag a naimbag kadagiti maseknan a residente tapno maipaadal kadagitoy ti nasken nga aramidenda iti panagsisina kadagiti basura.
Inbatadna a babaen iti daytoy ket ad-adda a maisuro kadagiti umili ti dakkel nga akem dagitoy nangruna ket adda dagiti narigat a maisuro pakaseknan iti panagsisina kadagiti basura.
Inlawlawagna a napintas iti panangbukel ti Ecological Waste Committee iti uneg ti barangay tapno dagitoy ti mangidaulo iti pannakatagiben iti aglawlaw pakairamanan ti umiso a panagibelleng kadagiti basura iti baet nga adda dagiti agkolektar kadagitoy.
Kunana a nasken a maammoan dagiti residente maipanggep dagiti responsibilidad dagitoy ken dagiti maipataw a pannusa kadagiti aglabsing iti daytoy a pagannurutan.
Innayonna nga agbirbirokda ti wagas tapno masolbar dagiti parikotda kadagiti natangken uloda wenno dagiti saan nga agtungtungpal kadagiti pagalagadan.
