LAOAG CITY – Nagiwaras ti gobierno ti Ecuador ti agarup 75,000 a suldado iti uppat a probinsia no sadinno nga adda ti nakaro a riribok.
Kagiddan daytoy, nangipatungpalda ti curfew iti rabii kas addang iti panangparmekda iti kriminilidad iti pagilianda.
Mainaig iti daytoy, sipud idi nagtugaw iti puesto idi 2023 ni Ecuador President Daniel Noboa ket nagbalin a naiget ti pananglaban daytoy kadagiti krimen nga adda ti pakainaiganna iti iligal a droga.
Nupay kasta, iti napalabas a tawen, nakairekord isuda ti adu nga insidente ti pannakatay iti pagilianda.
Naammoan a kas kadagiti dadduma a 17 a pagilian ket karaman ti Ecuador a naiget a lumablaban kadagiti criminal cartels a mangipatpatulod kadagiti iligal a droga.
Ti Ecuador ket adda iti tengnga ti Colombia ken Peru a kadakkelan a producers ti cocaine.
