LAOAG CITY – Indeklarar ni Ecuador President Daniel Noboa ti internal armed conflict iti pagilyan da a mangibilbilin iti security forces nga anupen dagiti criminal groups nga agisaksaknap ti kinadamsak iti nadakamat a pagilyan.
Daytoy ket kalpasan a sinerrek dagiti armado a grupo ti maysa a television network a kukua ti gobyerno ti Ecuador a nakabase iti Guayaquil bayat a naka-ere wenno live broadcast.
Nagpaputok pay dagiti suspek ken pinagpakleb da dagiti empleyado ti nasao a tv network.
Basar iti National Police ti Ecuador a nagresponde iti lugar, natiliw metlaeng ti special units dagiti armado a suspek ken inbakwit da dagiti staff ti nasao a media outlet ken agpapada a natalged dagitoy.
Narekobre dagiti otoridad iti lugar ti 4 a paltog, 2 a granada ken dagiti pagpabettak no sadinno a 13 a suspek ti natiliw ken agsungbat iti linteg.
Napasamak ti insidente kalpasan nga indeklarar ni President Daniel Noboa ti state of emergency kalpasan a nakalibas ti high-profile gang leader a ni Adolfo “Fito” Macias.
Naamoan a sipud naideklarar ti state of emergency ket addan ti pito a pulis ti nakautibo idinto a naruay dagiti behikulo a napuuran babaen kadagiti mapapati a gang members.
Nakabantay metten ti Armed Forces ti Ecuador iti lugar tapno tulungan dagiti otoridad a mangtiliw manen ken ni Macias.
