LAOAG CITY – Saan pay laeng a panawen ti panagragsak kalpasan a nawaya-wayaan ti siudad ti Marawi manipud iti ima dagiti terorista a Maute-ISIS.
Daytoy ti inbatad ni Lt. Col. Emmanuel Garcia, commander ti 4th Civil Relations Group ti Western Mindanao Command iti ekslusibo a pannakiuman ti Bombo Radyo Laoag.
Kuna na a mangisayangkat da pay ti mapping-up operation iti nasao siudad.
Babaen iti daytoy, namnamaen ni Garcia a maisalakan da pay dagiti nabatbati a kautibo dagiti terorista.
Inbatad na nga iyapura da nga iwayat ti rehabilitasyon iti siudad tapno makasubli metten dagii naibakwit a residente iti bukod da a lugar idiay Marawi.
Innayon ni Garcia a marigrigatan dagiti bakwit bayat ti panagtalinaed da pay laeng kadagiti evacuation center.
Kabayatanna, bassit laengen nga aldaw sakbay ti naan-anay a maneutralize amin dagiti nabatbati a terorista iti main battle area.
Kuna na nga umabot laengen ti nasurok 20 ti bilang dagiti terorista iti main battle area iti nasao a siudad.
Mainaig iti daytoy, inbatad ni Garcia a ti pannakaideklara a nawaya-wayaan ti Marawi ket para iti deklarasyon laeng gapu ta dandanin a malpas ti krisis.
Segun kenni Garcia, saan pay a makasubli dagiti residente gapu ta adda pay laeng ti iwayat da a clearing dagiti naimula nga improvised explosive devices ken unexploded ordnance.
Kuna na a mangiwayat met ti SOCO ken ti Management of the Dead and Missing para ti pannakarekobre dagiti bangkay ken ti sanitasyon ket ubraen dagiti pannakabagi ti Department of Health (DOH).
