LAOAG CITY – Maisayangkat ti EJ Obiena Sports Clinic iti Marcos Stadium iti masungad a Disiembre 6 agingga inton Disiembre 9.
Inlawlawag ni Mr. Gervy James Gumarit, mangidadaulo ti Provincial Communications and Media Office a puntiria a maipadalan iti nasao nga Sports Clinic ti sangapulo agingga iti duapulo nga atleta.
Mainaig iti daytoy, inbatadna a ti Provincial Government of Ilocos Norte ti mangkita kadagiti adda ti kapasidad wenno kabaelanna nga agbalin a nalaing a pole vaulter pakairamanan dagiti interesado nga agbalin a coach.
Inlawlawagna a plano ti Ilocos Norte Sports Office nga idadauloan ni Mrs. Helen Rose Domingo nga awisen ni Jesson Cid nga agbalin a coach dagiti local pole vaulter athletes babaen iti panang-train nga umuna kenkuana ni Obiena.
Kabayatanna, inpakaammo ni Gumarit a maidiaya a libre ti panagusar iti pole vaulting facility iti Marcos Stadium dagiti atleta nga adda iti babaen ti Ilocos Norte Sports Institute and Research wenno INSPIRE program ti Provincial Sports Office.
Immun-una ngem iti daytoy, inpakaammo ni Mr. Faivo Bartolome, Sports Consultant ti gobierno probinsial a maipalubos kadagiti atleta ti pole vault ti agusar iti pasilidad no makuyog dagitoy babaen kadagiti coach-da.
