LAOAG CITY – Inlawlawag ni Prof. Violeta Alonzo, maysa nga ekonomista ken mangisursuro iti Mariano Marcos State University (MMSU) dagiti positibo nga epekto ti panagswek ti piso kontra iti dolyar kalpasan a nagrikep ti P58.49 ti sukat ti maysa a dolyar.
Inbatad na a ti umuna a positibo nga epekto na ket mabenepisyaran dagiti adda ti kapamilya ken kabagyan na iti abroad wenno OFW remittances no sadinno a dakdakkel ti pakaisukatan na ti dolyar.
Maikadwa a positibo nga epekto na ket ti price competitiveness no sadinno nga ad-adon dagiti pagilyan a magutigot a gumatang kadagiti produkto ti Pilipinas gapu ta nababbaban ti panggatang da a dolyar.
Innayon na a no adda dagiti positibo nga epekto ti panagswek ti piso kontra dolyar ket adda met ti negatibo nga epekto na.
Daytoy ket ad-ado ti maibayad kadagiti produkto nga angkaten ti Pilipinas manipod kadagiti nagduduma a pagilyan usar ti dolyar.
Kuna na pay nga uray dagiti utang ti Pilipinas kadagiti nagduduma a pagilyan a baybayadan ket ngumato pakairamanan ti interest na gapu ta dolyar ti pagbayad.
Mainaig iti daytoy, kuna ni Alonzo a no nangato ti sukat ti dolyar kontra piso ket umado ti kwarta dagiti maseknan a sektor ket ad-ado met ti igatang da a mangitunda ti panagngato ti demand ti goods ken services a daytoy ket agresulta ti inflation rate.
