LAOAG CITY – Inbatad ni Mr. Maroof Malekyar, maysa nga Afghan National a kumarkaro latta ti sitwasyon idiay Afghanistan, nasuruken a makabolan ti napalabas sipud sinakop ti grupo a Taliban.
Iti interview kenkuana ti Bombo Radyo Laoag, inbaga na nga agtultuloy ti panagbagsak ti ekonomiya ti nasao a pagilyan.
Kuna na nga iti agdama ket nagtalinaed nga awan ti trabaho dagiti residente iti nasao a pagilyan ken awan payen ti ipauneg da.
Maladingitan ni Malekyar gapu ta awan ti makaammo no ania ti agbalin a biag da kadagiti sumarsaruno pay nga aldaw.
Inpakaammo na pay a nakabutbuteng ti sitwasyon iti Afghanistan gapu ta agsursursur dagiti Taliban ken no kayat da ti pumatay ket nawaya da a mangaramid.
Innayon na a kaadoan a patpatayen ti Taliban ket dagiti agtrabtrabaho iti gobierno ken ti korean forces no sadinno a mapan da latta pwersaen nga alaen dagitoy iti uneg ti pagtaengan da iti rabii ken awan ti makaammo no pangikabkabilan da kadakuada.
