LAOAG CITY – Inpakaammo ni Atty. Alipio Castillo, ti provincial election supervisor ditoy Ilocos Norte dagiti maipatungpal nga election ban para iti 2022 elections.
Daytoy ket kageddan ti panangrugi ti local campaign intuno bigat, Marso 25.
Segun ken ni Castillo, maysa ti appointments ban nu sadino a maipawil ti agapointar ti empleado ti gobierno, promotion, panagakar ken pannakaipangato ti sweldo.
Inbatad na a karaman ditoy ti public works ban nu sadino a maiparit ti infrastructure projects ken ti total gun ban nga agtultuloy a maiyimplimentar pakairamanan ti comelec checkpoint.
Kabayatanna, kuna ni Alipio a mabalin a saan a mairaman kadagiti nagduduma a wagas ti election ban dagiti social ken economic services nga isu ti masapol iti baet ti nagduduma a krisis a mapaspasaran ti pagilian.
Immuna iti daytoy, inlawlawag ni Castillo nga agtultuloy ti pannakaipatungpal dagiti election ban gapu met laeng iti aktibidad dagiti tattao a maikanniwas iti linteg bayat ti eleksyon.
