LAOAG CITY – Inbatad ni Ms. Marilyn Mariano, ti Election Officer iti ciudad ti Batac a saan nga isuda ti rumbeng a mapagsungbat iti maipagarop a pannakasukat ti listaan iti nangabak iti Barangay ken Sang. Kabataan Elections iti Barangay Tabug.
Segun kenni Mariano, dagiti nagserbi nga Electoral Board a bukbuklen dagiti mangisursuro ti rumbeng nga agpalawag no anya ti usto a napasamak.
Inlawlawag na a ti laeng nagbalin nga akem ti Commission on Elections iti ciudad ti Batac ket ti nangawat ti resulta ken saan da a mabalin a sukatan ti nailanad iti daytoy.
Kunana nga ada dagiti dimmanon kadakuada nga impormasyon a maipagarop nga awan dagiti watchers ken electoral board kabayatan ti panagbilang ti butos iti Barangay Tabug.
Malaksid iti daytoy, naglikudan ni Mariano ti alegasyon a tinawagan da ni Mr. Everett Ugot tapno ipakammo a saan nga isuda ti nangabak.
Maipalagip a kalikagom ni Ugot a maimbestigar ti nagbalin a resulta ti eleksyon gapo ta maipagarop a nasukatan ti resulta a dimmanon iti Commission on Elections, banag a naglikudan ni Mariano.
Inpakaammo na nga isuna ti naideklara a maikapito a nangabak a kagawad ngem saan nga isuna ti naiproklamar iti Commision on Elections.
Inlawlawag ni Ugot nga idi panagbibilangan ti butos ket nagtunos met ti butos na a 211 iti Catalino Acosta Memorial Elementary School ken 330 iti Tabug, no sadinno ti dagop a butos na ket 541.
Nupay kasta, nakigtot laengen kalpasan a naamoa na a 450 laengen ti butos na.
Kabayatanna, nagkamang ni Ugot iti Public Attorney’s Office (PAO) ken inbatad met ti maseknan a masapol a gutigoten ni Ugot dagiti nagbalin nga Electoral Board ti nasao a presinto ken kinadua dagiti mangisursuro isuna iti Commission on Elections ngem saan nga ipalubos ti Comelec a mabaliwan ti naiproklamar.
Iti agdama, kalikagom ni Ugot a mangipila ti electoral protest.
