LAOAG CITY – Saan pay a nalawag iti kampo ni dati a Senador Ferdinand “Bongbong” Marcos Jr. nu ti intero nga election protest ti nadismis iti korte suprema wenno ti Presidential Electoral Tribunal (PET).
Daytoy ti rakurak ni Atty. Vic Rodriguez, ti legal counsel ken pannakangiwat ti dati a senador.
Segun ken ni Rodriguez, saan da pay a masinunuo nu ti manual recount ti election protest laeng ti inbasura ti PET wenno karaman ti annulment ti eleksyon iti tallo a probinsya idiay Mindanao gapu iti maipagarup a panagswitik.
Kabayatanna, kuna ti abogado a maiyuray ti kopya ti pinal a desisyon ti PET seknan iti daytoy a banag.
Inbatad na nga apaman a maawat da ti kopya ket dagus a maaddaan ti intelligence legal plan seknan iti sumaruno nga addang nga aramiden ti kampo ni dati a senador Marcos.
Mainaig iti daytoy, inpetteng ni Rodriguez nga aniaman t pagbanagan ti election protest ket nakasaganada a mangileppas iti narugyan a laban.
Innayun na a lumaban latta ti biang ni Marcos iti 2022 elections.
