LAOAG CITY – Kitkitaen ti Bureau of Fire Protection ditoy siudad ti Laoag nga electrical wiring ti maysa kadagiti posible a namunganayan ti pannakauram ti maysa nga apartment iti Brgy. Nangalisan-B ditoy siudad.
Nupay kasta, agtultuloy pay laeng ti panangiwayatda ti imbestigasion maipanggep iti napasamak nga insidente.
Mainaig iti daytoy, segun ken ni Mrs. Mrs Janette Corpuz, agtagikua ti nauram nga apartment, nangrugi ti uram agarup 11:20 ti bigat ita nga aldaw.
Inbatadna nga apaman a nagturongda iti apartment ket napuskolen ti asok ti naimatanganda a rason nga insigida dagitoy a nagkiddaw ti tulong iti Bureau of Fire Protection ditoy siudad ti Laoag.
Inlawlawagna a dua laeng nga unit ti naokuparan no sadinno iti masungad nga unit ket awan ti agnanaed.
Gapu iti daytoy, inpalgakna a pinutedda ti koneksion ti kuriente dagiti unit a saan a maus-usar idi pandemia ngem apaman a nadamagda nga adda dagiti agtrabaho iti maipaspasdek a mall nga agsarsarak ti pagkaseraan ket dagusda nga inlukat manen ken insubli ti koneksion ti kuriente.
Naammoan nga awan ti appliances nga adda iti nasao a unit ken ti laeng adda ditoy ket dagiti daan a badbado.
Innayonna nga iti baet iti napasamak ket napalaos ti panagyamanna gapu ta awan ti nadangran iti insidente.
