LAOAG CITY – Pursigido ni Mr. Cipriano “Perry” Martinez, Acting General Manager ti Ilocos Norte Electric Cooperative wenno INEC a mangipatungpal iti napudno a serbisio kadagiti umili.
Segun kenkuana nga ar-aramidenna ti amin a kabaelanna tapno matungpalna ti nagbalin a karina ken ni Gob. Matthew Marcos Manotoc a mangipababa ti “electricity rate” ditoy probinsia.
Mainaig iti daytoy, kunana nga iti daytoy a bulan ti Abril ket rumbeng a 10.99 ti rate iti kada kilowatt hour ditoy probinsia gapu ta pimmigsa ti panagusar dagiti kakailian ti kuryente kangrunaanna iti “cooling system” kas iti aircon ken electric fan gubuay iti kinabara ti panawen.
Nupay kasta, kunana a kinasaritana ti Aboitiz Group tapno maidefer ti sumagmamano a nasken a bayadan ti kooperatiba.
Inbatadna a dimmanon iti agarup dua gasut a milyon a pisos ti bayadan ti Ilocos Norte Electric Cooperative ngem kiniddawna nga utang ti kooperatiba ti 13 a milyon a pisos tapno laeng maipababa ti rate iti 10.48 iti kada kilowatt hour.
Inlawlawagna a napalaus ti panagyamanna iti Aboitiz ta pinatganda ti kiddawna nga awan ti maipataw a surcharge iti 13 a milyon a pisos ken mabayadan apaman a bumaba ti bayadan ti kooperatiba wenno apaman a bumassit ti makunsumo dagiti umili.
Mamati ni Martinez a bumaba ti makunsumo dagiti umili nga elektrisidad apaman a madanon ti panagtutudo wenno apaman a lumamiis iti panawen ken daytoy a panawen ti planona a panagbayad ti kooperatiba iti Aboitiz tapno saan a marikna dagiti Member Consumer Owners wenno MCO’s ti Ilocos Norte Electric Cooperative.
Kabayatanna, inpakaammo ti Acting General Manager a dagiti mapaspasaran a brown out ket saan a gubuay iti kinakurang ti “power supply” ngem ad-adda a daytoy ket gapu iti linya.
