LAOAG CITY – Maikarkarigatan a saan a nangatngato ngem sangapulo a pisos ti “electricity rate” ti Ilocos Norte Electric Cooperative wenno INEC.
Daytoy ti inbunanag ni Mr. Cipriano “Perry” Martinez, Acting General Manager ti Ilocos Norte Electric Cooperative a no ma-total ti rate para iti bulan ti Agosto basar iti nagatang a power manipud kadagiti power providers ken iti mabayadan a buis ket dumanon iti P10.73 iti residential rate.
Nupay kasta, kas paset iti panangipatungpalna iti pammilin kenkuanada Gov. Matthew Marcos Manotoc, Sen. Imee Marcos ken ni Pres. Ferdinand R. Marcos Jr. a masapul a saan a maparigatan dagiti Member Consumer Owners wenno MCO’s ti Ilocos Norte Electric Cooperative ket maikalkalikagum a nababbaba ngem sangapulo a pisos ti electricity rate ditoy probinsia.
Imbatadna a babaen iti panangkitada a naimbag iti maipatungpal a “rate” tapno saan a maparigatan dagiti Member Consumer Owners a kas kadagiti kallabes a bulan ket napagbalin a 9.9086 ti “rate” para ita a bulan ti Agosto a nangatngato iti siyam a sentimos no maidasig itay napalabas a bulan ti Hulio.
Mainaig iti daytoy, inpalagipna nga us-usarenda ti “loan program” tapno saan a maipabaklay kadagiti Member Consumer Owners ti nangato a “rate” ti kuryente.
Inpanamnama na pay nga iti masungad a tawen 2025 ket nababbaba ngem innem a pisos ti pananggatang ti Ilocos Norte Electric Cooperative kadagiti power supplier iti babaen ti baro a kontrata ken iti pannakaipatungpal dagiti programa kas iti igagatang kadagiti renewable energy ken dadduma pay.
Kabayatanna, mannarimaan pay laeng ti computation ti rate ti kuryente para iti bulan ti Setyembre.
