LAOAG CITY – Rinugianen ti Korte Suprema nga ipatungpal ti electronic filing wenno eFiling Guidelines para kadagiti civil case kadagiti amin a trial courts.
Segun iti Korte Suprema, daytoy ket tapno mapaalisto ti proseso ken mapasayaat ti komunikasion iti nagbaetan dagiti partido.
Iti babaen ti Guidelines ken Rule 13-A ti Rules of Civil Procedure, ti filing ken service of non-initiatory pleadings ket maaramid laeng no mangipatulod ken mangisubmitir ti digital file format iti babaen ti e-mail.
Maipila a personal dagiti reklamo ken initiatory pleadings kadagiti korte idinto a maipatulod ti kopia ti reklamo babaen ti registered mail wenno kadagiti accredited courier.
Saan met a mabalin a denggen ti korte ti kaso agingga a saan a maipatulod ti nagreklamo ti digital copy iti uneg ti 24 nga oras kalpasan ti panangipila iti reklamo.
