LAOAG CITY – Nangipatuluden ti embahada ti Pilipinas iti Myanmar ti team tapno tumulong nga agbiruk kadagiti 4 a Pilipino a naireport a mapukpukaw iti ciudad ti Mandalay nga asideg iti episentro ti magnitude 7.7 a gingined.
Segun ken ni Angelito Nayan, chargè d’affaires ti Embahada ti Pilipinas iti Myanmar, addan iti biyahe ti nasao a team a bukbuklen ti 5 a miembro a pakairamanan ti vice consul ken defense attache.
Nagbiyahe babaen by land ti grupo ken manamnama nga agbaot ti 15 nga oras ti biyahe da sakbay a makadanun da iti lugar.
Bitbit pay ti grupo dagiti suplay nga ipaay da kadagiti Pilipino nga apektado ti gingined iti Mandalay.
Inpetteng pay ti opisyal ti kinapateg ti panangiyuswat ti ground assessments ken panangtingiting ti pagsayaatan ti Filipino community kadagiti natamaan ti gingined.
