LAOAG CITY – Inrakurak ni US Ambassador to Israel Mike Huckabee nga apagapaman a nadadael ti pasdek ti US Embassy branch iti Tel Aviv kalpasan a timmama ti Iranian missile iti asideg ti lugar, ngem inpasigurado na nga awan ti nasaktan a personnel.
Maipalagip a napasamak ti panagatake kalpasan a binomba ti Israel dagiti military target iti uneg ti Iran, no sadinno nga ado dagiti nangangato nga opisyal ken siyentipiko ti maipagarop a natay rason a simmubbot ti Iran ti nagsasaruno a missile strikes iti nagduduma a ciudad ti Israel, karaman ti Tel Aviv.
Temporaryo met a napaserraan ti US Embassy iti Jerusalem, bayat a naka-alerto paylaeng ken maipatpatungpal ti “shelter in place” order para kadagiti empleyado.
Kabayatanna, naamoan a maysa a nangato nga opisyal ti Estados Unidos ti nangibaga a linapdan ni US President Donald Trump ti plano ti Israel a patayen ni Iranian Supreme Leader Ayatollah Ali Khamenei.
