LAOAG CITY – Manamnama a maipasdek iti kabiitan a panawen ti Emergency Operation Center a para iti Provincial Resiliency Office ditoy probinsia.
Daytoy ti inpakaammo ni Engr. Randy Nicolas, Local Disaster Risk Reduction Management Officer 2 iti Provincial Resiliency Office.
Kunana naiyawaten ti plano a pannakipasdek ti Emergency Operation Center ditoy probinsia manipod iti Department of Public Works and Highways wenno DPWH kalpasan nga inaprobaran ni Gob. Mathew Marcos Manotoc.
Inlawlawagna a basar iti plano ket adda ti tallo a kadsaaran ti pasdek ken roof deck.
Mainaig iti daytoy, kinuna ni Nicolas a daytoy ket maipasdek iti asideg iti Department of Interior and Local Government Office wenno DILG ditoy cuidad.
Mangnamnama a babaen iti daytoy a tignay ket alalisto ti panagresponde ken serbio maipaay kadagiti umili no adda dagiti didigra.
Kabayatanna, naamoan a ti pondo ti nasao a pasdek ket agdagup iti P25 million manipod iti National Government.
