LAOAG CITY – Adda ti posibilidad a maikkat dagiti empleado nga staff iti border control iti ili ti Badoc no mapaneknekan nga agipalpalusot kadagiti non-residents ti Ilocos Norte tapno saan a dumalan iti antigen test.
Daytoy ti takder ni Police Major Joseph Tayaban, ti hepe ti PNP-Badoc kalpasan nga adda dagiti impormasyon nga adda dagiti indibidual a makalusot iti border gapo ta 4-5 laeng nga oras ti panagtalinaed da iti probinsya.
Segun kenni Tayaban, dagiti saan a residente a nagrehitro iti S-pass ken no dagitoy ket turista ket saanen a kasapulan a dumalan da iti antigen test.
Nupay kasta, dagiti visiting non-residents, undispensable travel, APOR ken dadduma pay a saan a taga Ilocos Norte a sumrek ditoy probinsya ket masapol nga adda ti negatibo a resulta ti antigen test.
Mainaig iti daytoy, iti biang ti border control iti ili ti Badoc, kuna ni Tayaban nga awan met pay ti report nga adda ti makalkalusot wenno saan a dimmalan iti test.
