LAOAG CITY – Napanunot ni Kandula Nagaraju nga i-delete dagiti server ti kompania kas panagibales na gapu iti panagikkat da kenkuana iti trabaho.
Dati nga agtartrabaho ni Nagaraju iti kompania kas paset ti quality assurance computer systems team idiay Singapore.
Mainaig iti daytoy, ti grupo a nakaikamengna ket agus-usar kadagiti test servers a mangpataray kadagiti applications wenno program sakbay nga usaren dagiti kustomer ken end users ti kompania.
Maibasar iti assessment ti kompania, saan a nasayaat ti performance ni Nagaraju ngem napalubosan nga agtrabaho iti nasurok a makabulan.
Gapu iti daytoy, nagpungtot ni Nagaraju isu nga inadalna ti pannakaaramid kadagiti script a mangikkat kadagiti virtual server.
Malaksid iti daytoy, nagimbistigar ti kompania ti pannaka-hack dagiti server-da ket nasarakanda ti Internet Protocol address ti suspek.
Segun iti kompania, saanda nga inikkat dagiti access credentials ni Nagaraju kalpasan ti panagtrabahona.
Kabayatanna, pinaigetan ti kompania ti panagbantay dagiti virtual server-na ken naing-inget a monitoring.
