LAOAG CITY – Inpetteng ni Atty. Joel Ginez, election superviser ditoy probinsya a saan a mabalin nga agikampanya kadagiti kandidato dagiti empleado iti gobierno ken dagiti barangay officials para iti May 13 Midterm Elections.
Reaksyon na daytoy kalpasan nga adda dagiti reklamo a naidanun iti Bombo Radyo mainaig ti maipagarop a kaadda dagiti sumagmamano nga empleado ti gobierno a mapan sumursurot nga agkampanya kadagiti kandidato.
Inbatad ni Ginez a mabalin a mapilaan ti kaso administratibo dagiti maseknan nga empleado ti gobierno wenno kaso kriminal a mabalin a pakaikkatan da iti serbisyo.
Malaksid ti daytoy, kuna pay ni Ginez a saan a mabalin nga agsuot kadagiti T-shirts nga adda nagan ken ladawan ti maysa a kandidato dagiti empleado ti gobierno ken barangay officials.
