LAOAG CITY – Nangiparuk-at ti memorandum ni Mayor Richard Degala iti ili ti Vintar a no mapan agbisita iti nagduduma a barangay dagiti empleado ti gobierno lokal iti nasao nga ili ket masapol nga agbalon da ti bukod da a kanen ken meryenda.
Inlawlawag na a basar iti kapadasan na idi agserserbi paylaeng kas brgy. Chairman ket masapol a saganaan da no ammo da nga adda ti mapan bumisita nga empleado ti gobierno.
Inpetteng na nga alisto laeng a saganaan no maysa wenno dua nga empleado ngem ti narigat ket no grupo dagitoy kangrunaan na no awan ti nairana a budget dagiti nakaduty nga opisyal ti barangay.
Inpalgak ti mayor a dagiti empleado ti gobierno ket agswel-sweldo, malaksid pay dagiti dadduma a maaw-awat da a benepisyo.
Gapu iti daytoy, nangiparuk-at ti pammilin ni Mayor Degala nga awan ti siasinno man nga empleado ti gobierno nga agkiddaw ti libre a makan wenno meryenda iti ibibisita da iti nagduduma a barangay iti nasao nga ili.
Innayon na a napanunot na daytoy nga addang tapno malag-anan dagiti opisyal ti barangay iti intero nga ili ti Vintar.
