LAOAG CITY – Naiget ti panagimbestigar ti gobierno lokal ditoy ciudad ti Laoag iti maipagarop a panagtakaw ti bangus ti maysa nga empleado iti merkado publiko.
Immunan nga inbatad ti aglaklako iti merkado publiko a ni Mrs. Marilyn Domingo a namidua a daras a natakawan da ti saglilima a pidaso no sadinno nga agbalor amin dagitoy ti 1,200 a pisos.
Kuna na pay nga uray ti kaabay da a pwesto ket napukawan ti dua a pedaso a bangus.
Inpakaammo na nga iti panangrebisar da iti CCTV a nakaimuntar iti lugar ket nakita da a ti nagala ket ti maysa nga utiliy iti merkado publiko.
Innayon na nga iti panagsasarita da ket inbatad ti suspek a nagipit laeng isut gapuna a naaramid na ti nagtakaw ti bangus.
Segun ken ni Domingo, awan ti plano da nga agpila ti reklamo no di ket pabayadan da lattan ti innala ti suspek.
Kabayatanna, inbatad ni Mrs. Blenda Almo, ti Officer-In-Charge iti merkado publiko a napasamak ti panagsasarita dagiti maseknan idi Biernes, Hunyo 30 ngem kalpasan agpapan maisursurat daytoy a damag ket saan pay a napan nagreport iti trabaho na ti suspek.
Inpalgak na a gapu iti inaramid ti nasao nga empleado ket iyakar da iti sabali a department kabayatan ti pannakaiproseso ti kaso na.
