LAOAG CITY – Inbatad ni Atty. Julius Balbas, ti comelec officer ditoy ciudad ti Laoag a mabalin latta ti mangipila reklamo kontra kadagiti empleado ken opisyal ti gobierno a nakiraman idi 2019 midterm elections.
Reaksyon daytoy ni Balbas kalpasan a nagpangta ni Incoming Mayor Michael Marcos Keon ditoy ciudad ti Laoag a pilaan na ti reklamo dagiti empleado ken opisyal ti gobierno ditoy ciudad a nagikampanya idi eleksyon.
Nupay kasta, kuna ni Balbas a ti Civil Service Commission (CSC) ti akin-hurisdiksyon iti daytoy ken ti laeng mabalin da nga aramiden ket ti mangasistir ti nasao nga opisina.
Innayon ni Balbas a ti kadagsenan a maipataw a pannusa ti opisyal ken empleado ti gobierno a mapaneknekan a nakigamulo iti eleksyon ket ti pannakaikkat da iti trabaho.
Maipalagip a naiget a maipawil dagiti empleado ken opisyal ti gobierno a makibiang iti eleksyon.
Inlawlawag met ni Atty. Rex Amy iti Civil Service Commission (CSC) ditoy probinsya ti proseso ti pannakaipila ti reklamo kontra kadagiti empleado ken opisyal ti gobierno a nakibiang idi eleksyon.
Kuna na a masapol nga amwen da nga umuna no ania ti ipila ti complainant a reklamo, ken no makita da a daytoy ket seryoso ket mangiyuswat da ti preliminary investigation.
Segun kenkuana, no serious offense ti reklamo a naipila kontra iti maysa nga empleado ket possible a masuspenso ti maysa a tawen wenno naan-anay a maikkat iti serbisyo.
Nupay kasta, inpasingked ni Amy a masurot ti due process iti aniaman a maipila a reklamo.
