LAOAG CITY – Natay ti maysa nga empleado ti ciudad ti Laoag kalpasan a naoperahan gapo ti sakit nga almoranas.
Immuna iti daytoy, naitaray iti Governor Roque Ablan Sr. Memorial Hospital ni BJ Tabieros, residente ti Brgy. Calayab ditoy ciudad gapo ta agsaksakit ti kimmot na.
Segun kenni Karen Tabieros, ipag ng biktima, kalpasan ti operasyon ket limteg ti kimmot ti biktima ken kimmaro a nagsakit.
Naamoan a kalpasan ti dua nga aldaw sipud naopera ti kimmot na ket simmaruno a naaopera ti buksit na gapo iti appendisitis.
Mamati ti pamilya Tabieros a kimmaro pay ti sakit a marikrikna ti biktima gapo ta kalpasan ti operasyon ket nagwal-wala no sadinno a pinugsat na dagiti nakakabit kenkuana kas iti dextrose.
Gapo iti daytoy, nagdesisyon ti pamilya nga iyakar ti biktima iti Mariano Marcos Memorial Hospital and Medical Center iti ciudad ti Batac.
Inbatad na a bayat a tamtamingen dagiti doktor ti biktima ket adoti rimuar a natay a dara manipud iti agong na ken kalpasan ti tallo nga oras ket natay daytoy.
Innayon na nga apaman a maamoan da ti resulta ti autopsy ti bangkay ti biktima ken mapaneknekan nga adda ti basol ti ummuna nga ospital a nakaitarayan na ket mangipila da ti kaso.
Kabayatanna, nagkedked a mangipaay ti komento ti ospital gapo ta adalen da pay a naimbag ti nasao a pasamak.
