LAOAG CITY – Natukkol ti akinkannigid a lupo ti maysa nga empleyado ti DPWH ken nagsagaba ti gasgas iti nagduduma a paset ti bagina kalpasan ti napasamak a desgrasya iti By-pass road a bisinidad ti Brgy. Pila ditoy siudad ti Laoag.
Basar iti imbestigasyon ti PNP Traffic Division ditoy siudad ti Laoag, agpapaabagatan a direksyon ti Toyota Hi Ace Van nga inturong ni Mark Lester Constantino y Arucan, agtawen ti 22, single, estudyate ken residente iti Brgy. 33-Cabulalaan iti ili ti Bacarra idi ta kellaat a dinungpar ti sumarsaruno a suzuki Raider 150 nga inturong ni Yvan Joshua Espiritu y Bellon, agtawen ti 25, single, empleado ti DPWH, tubo iti Refaro, San Juan, Ilocos Sur ngem temporaryo nga agnanaed iti Brgy. Cabungaan ditoy siudad ti Laoag.
Rumrumuar a napaspas ti taray ti motorsiklo isut gapu na a nadungpar na ti van.
Naitaray iti Governor Roque Ablan Senior Memorial Hospital ni Bellon gapu iti sinagaba na a sugat idinto a saan a naan-ano ni Arucan.
Saan met pay a nakapagsarita dagiti agsinumbangir a partido ken saan pay a masinunuo ti pakadagupan ti perdisyon nga intunda ti desgrasya kadagiti lugan dagiti maseknan.
