LAOAG CITY – Inlawlawag ni Mrs. Milagros Sales, empleado ti Laoag City Public Market and Commercial Complex no apay a pinagsaosaoanna ti maysa a Civil Security Unit personnel a ni Ms. Mary Joy Bartolome ditoy siudad ti Laoag.
Segun kenkuana, kabayatan a sumungsungad isuna a magmagna ket adda ni Bartolome ken dagiti kakaduana a manarimaan ti panagestoriada agingga a nangngegna ti sarita nga “Intayon adda tay ag-report-en.”
Inbatadna nga inpagarupna nga isuna ti pagsasaritaanda gapu ta agkakatawada isu a pinagsaosaoanna ni Bartolome.
Nupay kasta, inpalgakna a mamati ni Sales nga isuna ti pagsasaritaan da Bartolome gapu ta addan ti immuna a susik dagitoy.
Mainaig iti daytoy, pinadas nga innala ti Bombo Radyo Laoag News Team ti takder ni Bartolome ngem adda ti klasena.
Kabayatanna, inpeksa ni Sales ti sakit ti nakemna iti maysa nga estasion ti radyo a nangipatangatang daytoy a pasamak ngem saanda man laeng innala ti takderna.
Gapu iti daytoy, maragsakan iti Bombo Radyo a naala ti takderna maipanggep iti napasamak tapno mailawlawag a naimbag daytoy a banag.
Iti agdama, manamnama a maimbitaran iti opisina ti Laoag City Public Market and Commercial Complex ken iti Civil Security Unit dagiti dua a maseknan tapno masolbar daytoy a problema.
