LAOAG CITY – Natay ti maysa nga empleyado ti punenarya kalpasan a natamaan ti ulo na ti natennag a bato manipud iti bantay iti paset ti Brgy. Dipilat, Vintar, Ilocos Norte.
Nabigbig ti biktima a ni Antonio Agcanas, agtawen ti 52 ken residente iti Brgy. Sta. Rosa iti ili a Sarrat.
Segun iti search and rescue team nga indaulwan ni Mr. Almond Leaño, mapan kuma mangipaay ti serbisyo ti biktima ken ti manager na iti agpunpun ngem saan da a makalasat gapo kadagiti bato nga adda iti tengnga ti dalan.
Iti imbestigasyon, timmulong ni Agcanas iti panagikkat kadagiti bato ngem bayat nga agiwal-walin ket eksakto a tanennag ti bato manipud iti bantay ken timmama iti ulo na.
Naitaray ti biktima iti ospital ngem saanen nga immabot a sibibiag.
