LAOAG CITY – Inawagan ti Employers Confederation of the Philippines (ECOP) a counterproductive ken mabalin a makaapektar iti ekonomia ti gakat a kanayonan a P200 across-the board iti inaldaw a sueldo dagiti mangmangged iti pribado a sektor.
Segun ken ni Employers Confederation of the Philippines President Sergio Ortiz-Luiz Jr, napintas daytoy a denggen ngem sumagmamano laeng ti mabenepisiaran iti daytoy.
Inbatadna a naruay a mangmangged ita ket agtrabtrabaho iti informal sector.
Nasurok kagudua a negosiante iti pagilian ket adda iti micro and small enterprises isu narigat para kadakuada ti pannakaipatungpal ti kanayonan a P200 iti inaldaw a sueldo kadagiti mangmanggedda.
Agresulta laeng daytoy iti panagngato ti presio dagiti produkto dagiti negosiante wenno ti nadagdagsen ket ti panagkissay kadagiti empleadoda.
Naipaay met iti desision kadagiti regional wage board no sadinno a bukbuklen daytoy ti gobierno, employers ken dagiti mangmangged.
Maipalaip nga inaprobaranen ti House Committee on Labor and Employment ti gakat a P200 across-the-board increase iti inaldaw a sueldo dagiti mangmangged iti pribado a sektor.
