LAOAG CITY – Inpakaammo ni Bombo International News Correspondent Mrs. Gina Abaco Bartolome, Overseas Filipino Worker idiay Lebanon nga ummanamong dagiti employers-da a mangibakwit kenkuada iti nataltalged a lugar kabayatan ti Hezbollah-Israel conflict.
Segun kenkuana, idi nakabase da pay laeng iti Beirut, agtultuloy ti panagbuteng dagiti umili gapu iti kellaat nga air strike a mangpeggad iti kinatalgedda.
Inbatadna a dagiti kanayon a panangraut ket mangiyeg iti adu a buteng iti lugarda.
Kinunana a basar kadagiti mangmangeganda a damag maipapan iti posibilidad ti ad-adu pay a riribuk manipud kadagiti kabangibang a pagilian, ket awan pay ti konkreto nga impormasion nga ipaay ti embahada.
Kas maysa nga ina nga addaan iti dua nga annak a pagadadalenna, saan daytoy a makaawid iti Pilipinas gapu iti pagrebbengan iti pamiliana.
Mainaig iti daytoy, inkeddeng ti Philippine Embassy nga agawid dagiti Pilipino idiay Beirut, South Lebanon, ken iti Bekaa Valley ket nakasagana isuna a mangsurot iti bilin.
Inpaganetgetna a maysa isuna kadagiti nasugatan iti panagbettak idiay Marina idi tawen 2020 no sadinno awan met dagiti evacuation centers a mabalin a papananda no man adda ti mapasamak.
