LAOAG CITY – Inlawlawag ni Department of Energy (DOE) Secretary Sharon Garin, a saan pay a marikna ti panagbaba ti presyo iti langis iti baet ti natalged nga idadalyasat ti Philippine-flagged vessels iti Strait of Hormuz.
Inbatad na a saan dagos a masolbar ti panangipatalged ti Iran para iti naan-annayas a panagdalyasat dagiti barko nga adda lugan na a Pilipino crew ken saan a maikkat dagiti pangta.
Kuna ti opisyal a mangipaay daytoy iti Pilipinas iti natalged ken “preferential access” iti kritikal a suplay ti langis.
Innayon na a nupay kaadwan kadagiti langis iti pagilian ket manipod regional hubs kas koma iti Singapore wenno Korea, ti krudo ket maiproseso kadagiti refineries tapno agbalin a produkto a petrolyo ken dumaldalyasat iti Strait of Hormuz.
Gapu iti daytoy, aniaman a pannakaitantan ket mangpataud iti domino effect a mangapektar iti sangalubongan a suplay ti langis, nangnangruna dagiti presio.
Nupay kasta, kunana a ti kangrunaan a prioridad ti gobierno ket agtalinaed ti panangibaba iti presio ti langis ken panangipasigurado iti agtultuloy a suplay iti baet ti agtultuloy nga emerhensia ti enerhia iti pagilian.
