LAOAG CITY – Inpakaamo ni Engr. Maricel Badua ti Officer in Charge ti City Engineering’s Office dtoy ciudad ti Laoag nga awan pay ti naawawat da a report manipod kadagiti residente mainaig iti maum-ummong a danom manipod iti agleplepyas a kanal iti Don Mauricio St. a sakupen ti Barangay 7.
Kuna ni Badua a daytoy ti umuna a gundaway a naamwan ti opisina da ti sitwasyon iti nasao a dalan.
Mainaig iti daytoy, inpasigurado na nga mapan da kitaen daytoy intunno bigat tapno maplano nu ana ti kasapulan a maaramid a mangsolbar iti problema.
Maipalagip nga immunan a nagpanawagan dagiti tricycle drivers nga agpilpila iti Don Mauricio St. iti Barangay 7 ditoy ciudad ti Laoag mainaig iti pannakaaksyun ti maum-ummong a danon iti nasao a dalan gapu ta malaksid nga aglumlumoten ket makaited pay ti nabangsit nga angot.
Segun ti maysa a tricycle driver a ni Mr. Romeo Raquinio, nabayagen a problema da daytoy ken nabayagen a naiyuman iti Laoag City Hall kangrunaan na iti City Engineering Office ngem agpapan ita ket saan da pay nga inaksyunan.
Kabayatanna, mangnamnama ni Raquinio a masolbar daytoy a problema da iti kabiitan a panawen gapu ta saan laeng nga isuda ti maapektaran no di ket uray dagiti pasahero ken tattao a lumabas iti lugar.
