LAOAG CITY – Nagkiddaw ni Engr. Glenn Miguel iti 1st Engineering District iti Department of Public Works and Highways ditoy ciudad ti Laoag, ti naan-anay a pannakaawat ti publiko kagiddan ti panagpadespensar na gapu iti agdama a sitwasyon iti Gilbert Bridge kangrunaan na ti mairekreklamo nga humps.
Inpasingked ni Miguel nga ar-aramiden da amin dagiti possible a remedyo ti mairekreklamo nga humps iti Gilbert Bridge kas ti pannakaikabil paylaeng ti aspalto na tapno saan a lumawa wenno dumakkel ti abot.
Kuna na a babaen iti daytoy ket masigurado ti kinatalged dagiti agdaldalyasat iti lugar.
Innayon na a ti problema iti daytoy ket ti construction joint isut gapuna a kasapulan a ma-repair tapno saan nga humps ti maikabil.
Mainaig iti daytoy, inpakaammo ni Miguel nga adda ti 40-milyon a pisos a nailungalong a pondo para iti 2024 para iti pannakatarimaan ti Gilbert Bridge ditoy ciudad ti Laoag.
Immuna iti daytoy, inrakurak ni Mayor Michael Marcos-Keon a ti Department of Public Works and Highways ti akinsakop iti problema iti Gilbert Bridge.
