LAOAG CITY – Inpeksa ni Engr. Neil Jose, agtagikua ti Pugad Lawin Cargo Bus ti karirikna na iti kapadasan dagiti empleado na iti border control iti ili ti Pagudpud.
Segun kenni Jose, naperdian ti maysa a cargo bus da ditoy ciudad ti Laoag rason a naiyakar dagiti karga daytoy ken agturong iti probinsya ti Cagayan ken iti panagal-alisto ti driver ket sabali ti naala na nga antigen test result wenno kukua ti kaubraan na.
Inlawlawag na nga idi adda iti border control ket sinita ti agnagan ti Ritchie Aguinaldo gapo ta sabali ti antigen test test result.
Gapo iti daytoy, dagus a timmawag ti driver iti opisina da ditoy ciudad ti Laoag ken naipatulod met ti ladawan ti antigen test result ken resulta ngem maipagarop a saan latta nga inawat ni Aguinaldo.
Kunana a gapo iti daytoy ket tinawagan na ni Mr. Ryan Remigio ken naibaga a mabalin met a mapaneknekan nga husto ti naipatulod a test result ken resibo.
Inbatad ni Jose a nabastosan ken nakapungtot pay gapo iti maipagarop a panagkwestyunar ni Aguinaldo iti panangdamag na no anya nga opisina nga agtrabtrabaho ti maseknan ken kinulkol na ti MINC ID ti bus.
Inadmitir na nga adda da ti biddot ti driver ngem saan a rumbeng a madi ti pannakatrato dagiti empleado na.
Mainaig iti daytoy, kalikagom na nga agbati kuma lattan ti driver tapno saan a madelay ti byahe ti cargo bus ngem saan nga inpalubos ni Aguinaldo.
Inpalgak na a saan a nagbayag ket pinalubusan met laeng ti maseknan ti cargo bus ngem nga iti dayta a gundaway ket maipagarop a nangato ti boses daytoy a nakisarsarita.
Naamoan pay a maipagarop a ni Aguinaldo manen ti nangbugka-bugkaw iti maysa a driver da iti napalpalabas a bulan.
Kinumpirmaran ni Provincial Human Resource Management Officer Fe Siazon nga adda ti agnagan ti John Risse Aguinaldo, maysa nga Administrative Aide ti Office of the Barangay Affairs wenno OBA ti Kapitolio Probinsial ti Ilocos Norte nga agdama a naidesignar iti Pagudpud Border Checkpoint.
Kunana a basar iti record da ket maibilang daytoy kas maysa a Job Order nga empleado nga agpaot laeng iti tallo a bulan a nangrugi idi Abril iti agdama a tawen ken agngudo ti kontrata na iti daytoy a bulan.
Inlawlawag na nga awan met pay ti naawat na a formal complaint rason a saan pay daytoy a makaited ti aniaman a komento pakaseknan iti isyu a napasamak iti Pagudpud Border Checkpoint.
Nupay kasta, inpasigurado na nga idanon na daytoy ken ni Mr. Ryan Remigio, External Affairs Consultant ti probinsia ken mangidadaulo iti Border Checkpoint ditoy probinsia tapno maaramid dagiti rumbeng a maipatungpal nga addang.
Innayon na a ginutigot na ti agrekreklamo a mangipasa ti formal complaint iti opisina mismo ti Provincial Human Resources Office a maiturong iti opisina ni Gob. Matthew Marcos Manotoc.
