LAOAG CITY – Nagkiddaw ti konsiderasyon ni Engr. Nestor Pasion iti 1st Engineering District iti Department of Public Works and Highways (DPWH) ditoy probinsya seknan ti pannakadadael iti sumagmamano a paset ti Spanish colonial era bridge iti Barangay Barit ditoy ciudad ti Laoag a naipasdek pay laeng idi panawen ti kastila.
Iti Ilocos Norte Board Committee Hearing, inlawlawag ni Pasion nga iti program of works ket awan ti madadael iti nasao a rangtay, ngem iti pannakaipatungpal ti proyekto ket nawagwag ken adda dagiti natennag a sumagmamano a partes na.
Immunan nga inpetteng ni Atty. Vicentito Lazo, kameng iti Sang panlalawigan ditoy probinsya a naipalaon ti paglintegan a no adda ti mangperdi kadagiti kakastoy nga istruktura ket agmulta iti 200 a ribo a pisos ken maibalud iti saan a nababbaba ngem 10 a tawen.
Iti panagsaludsud ni Lazo ken ni Pasion no nakasagana nga agmulta iti 200 a ribo a pisos ket nagkiddaw iti konsiderasyon ti nasao nga inhinyero.
Gapu iti daytoy, inbatad ni Lazo a masapol a mapilaan ti kaso dagiti adda ti pannakainaig na iti pannakadadael ti nasao a rangtay tapno mapilitan da nga agsungbat ken maisubli ti dati nga itsura ti rangtay nga awan ti gastos ti gobierno, ket immanamong met ni Pasion.
